“Rusiya qəbul edilməyən kapitulyasiya xarakterli “sülh planına” cavab olaraq Kiyevə ağır hücumlar edib”.
Bugun.tv- xəbər verir ki, bu barədə şərhi siyasi ekspert, Milli Cəbhə Partiyasının sədr müavini Məhəmməd Əsədullazadə öz sosial media hesabında paylaşıb.
Ekspertin sözlərinə görə, ABŞ Prezidenti Donald Trampın Ukrayna üzrə irəli sürdüyü 28 maddəlik “sülh planı” Avropa və Ukrayna tərəfindən qəbul edilməyib və artıq gündəmdən çıxıb. Hazırda Avropa, ABŞ və Ukraynanın Cenevrədə hazırladığı 19 maddəlik atəşkəs sənədi müzakirə olunur.
Əsədullazadə qeyd edir ki, Rusiyanın bu plana reaksiyası çox sərt olub və Moskva Kiyevə genişmiqyaslı ballistik raket və dron hücumları həyata keçirib. Bu, Rusiyanın Avropanın hazırladığı yeni atəşkəs planını qəbul etmək niyyətində olmadığını göstərir.
Hazırda ABŞ və Rusiya arasında Əbu-Dabidə danışıqlar aparılır və nəticələrin Avropa və Ukrayna ilə paylaşılacağı gözlənilir. Ekspert bildirir ki, Avropa ABŞ-ın təkbaşına qərar qəbul etməsinin qarşısını alır. Eyni zamanda, Türkiyə də Trampın 28 maddəlik əvvəlki planını qəbul etməyib və Avropa ilə ABŞ birlikdə yeni bir atəşkəs sənədi hazırlayıb.
Əsədullazadəyə görə, Ukraynada Rusiyanın müəyyən üstünlüyə nail olması eskalasiyanı artırır və Moskva “hücum edərək qazanmaq” strategiyasına üstünlük verir. Bu isə bölgədə digər qonşu ölkələrə qarşı hərbi təzyiqlərin artması ehtimalını gücləndirir.
Ekspert əlavə edir ki, Avropa prosesə obyektiv yanaşsa da, ABŞ prezidenti Donald Tramp Ukrayna məsələsinə daha spesifik yanaşır. Onun üçün əsas məqsəd atəşkəsin əldə olunmasıdır və Ukraynanın müəyyən torpaq güzəştlərinə getməsi real variant kimi görünür. Atəşkəsdən sonra isə ABŞ–Rusiya iqtisadi əlaqələrinin bərpası və yeni investisiya layihələrinin gündəmə gələcəyi proqnozlaşdırılır.
M. Əsədullazadə sonda qeyd edir ki, Rusiyanın hədəfi sosial rifah deyil, yeni ərazilər qazanmaq və imperial maraqlarını genişləndirməkdir.