Yanvarın 15-də ABŞ ordusu Almaniyada Ukrayna qoşunlarının döyüş hazırlığına başlayıb.
Bugun.tv xəbər verir ki. bu barədə “Associated Press” ABŞ Silahlı Qüvvələrinin Birləşmiş Qərargah Rəisləri Komitəsinin nümayəndəsi Mark Milliyə istinadən məlumat yayıb.
Qeyd edildiyi kimi, yeni genişləndirilmiş döyüş hazırlığına başlanılıb. Təxminən 500 əsgərdən ibarət batalyon növbəti 5-8 həftə ərzində döyüş meydanına qayıdacaq. Təlim keçəcək ukraynalı hərbçilər bir neçə gün əvvəl Ukraynanı tərk ediblər.
Hələlik Pentaqon təlimlərin başlama tarixini açıqlamayıb. Associated Press-in məlumatına görə, Amerika Birləşmiş Ştatları artıq 3000-dən çox Ukrayna əsgərinə zirehli texnika, haubitsa və HIMARS sistemləri də daxil olmaqla, müəyyən növ texnika və silahların istifadəsi və onlara texniki xidmət göstərilməsi üzrə təlim keçib.
Bundan əvvəl ABŞ prezidenti Co Bayden və Almaniya kansleri Olaf Şolz telefonla danışaraq, Ukraynaya ağır hərbi texnikanın tədarükü barədə razılığa gəliblər. Almaniya Patriot hava hücumundan müdafiə sistemləri və Marder piyada döyüş maşınlarını göndərməyə hazır olduğunu bildirib.
Rusiya Ukraynaya silah tədarükü ilə bağlı NATO ölkələrinə nota göndərib. Rusiya Federasiyası Prezidentinin mətbuat katibi Dmitri Peskov bildirib ki, Qərbin Ukraynaya silah göndərməsi Moskva və Kiyev arasında danışıqlara kömək etmir, əksinə, mənfi təsir göstərir.