Britaniya Xarici İşlər Nazirliyi ötən il Britaniya diplomatının Rusiyadan qovulmasına cavab olaraq rusiyalı diplomatı deportasiya etmək qərarına gəlib.
Bildirilib ki, Rusiya səfiri Andrey Kelin adı açıqlanmayan rus diplomatın akkreditasiyasının ləğvi üçün yüksək rütbəli Britaniya rəsmisi ilə görüşmək üçün nazirliyə çağırılıb.
Britaniya Xarici İşlər Nazirliyinin sözçüsü deyib: “Rusiya səfiri Andrey Kelini rusiyalı diplomatın akkreditasiyasını ləğv etmək üçün yüksək rütbəli Britaniya rəsmisi ilə görüşməyə çağırdıq. Bu, Rusiyanın noyabr ayında Britaniya diplomatının Moskvadakı icazəsinin ləğvi ilə bağlı əsassız qərarına cavabıdır”.
“Böyük Britaniya əməkdaşlarımızın səlahiyyətlərinin ləğvi ilə qorxudulmasına dözməyəcək. Buna görə də biz tədbir gördük. Rusiyanın atdığı hər hansı addım eskalasiya hesab olunacaq və ona müvafiq cavab veriləcək”, – sözçü bildirib.
Rusiya Federal Təhlükəsizlik Xidmətinin İctimaiyyətlə Əlaqələr Mərkəzi 2024-cü ilin noyabrında Böyük Britaniya səfirliyində işləyən və avqust ayında Rusiyadan deportasiya edilən kəşfiyyatçıların yerinə təyin edilmiş britaniyalı diplomat Wilkes Pryorun deportasiya edilməsinə qərar vermişdi.
Mənbə: İlkha