Rusiya Xarici İşlər Nazirliyi Yaxın Şərqdə artan gərginliklə bağlı açıqlama verərək, bölgədə vəziyyətin nəzarətdən çıxma riskinin artdığını bildirib. Bu barədə TGRTHaber məlumat yayıb.
Açıqlamada ABŞ və İsrailin İranla bağlı hərəkətləri nəticəsində yaranan gərginliyin daha da dərinləşdiyi vurğulanıb. Rusiya tərəfi xüsusilə nüvə obyektləri ətrafında baş verə biləcək hər hansı hadisənin ciddi fəsadlar doğura biləcəyini qeyd edib.
Moskva bildirir ki, İranın Buşehr Atom Elektrik Stansiyası kimi obyektlərinə mümkün hücumlar region üçün “Çernobildən daha ağır radioloji fəlakət” riski yarada bilər.
Rusiya Xarici İşlər Nazirliyi həmçinin ABŞ və İsrailin hərəkətlərini tənqid edərək, bölgədəki vəziyyətin sürətlə pisləşdiyini və tam nəzarətdən çıxma təhlükəsi daşıdığını bildirib.
Açıqlamada diqqət çəkən məqamlardan biri də Türkiyənin diplomatik roluna verilən qiymətdir. Rusiya Türkiye, Çin və Pakistan kimi ölkələrin gərginliyin azaldılması istiqamətindəki təşəbbüslərini müsbət qiymətləndirib.
Moskva tərəfi münaqişənin yalnız siyasi və diplomatik yollarla həll olunmalı olduğunu bildirərək, tərəfləri təxribatçı bəyanatlardan və eskalasiya yaradan addımlardan çəkinməyə çağırıb.
Rusiya həmçinin BMT çərçivəsində diplomatik həll yollarının dəstəklənməsinin vacibliyini vurğulayıb və beynəlxalq ictimaiyyəti müharibənin genişlənməsinin qarşısını almağa çağırıb.