NATO-nun baş katibi Mark Rutte Polşaya rəsmi səfəri çərçivəsində müdafiə naziri Vladislav Kosiniak-Kamışla birgə mətbuat konfransında çıxış edib. O, Polşanın ÜDM-in 4,5 faizindən çoxunu müdafiəyə ayırmasını, F-35 qırıcıları almaq planlarını və 2035-ci ilə qədər ordunu 300 min nəfərə çatdırmaq məqsədini NATO üçün mühüm addımlar kimi dəyərləndirib.
Rutte Polşanın Ukraynaya müharibənin əvvəlindən bəri 4 milyard avrodan çox hərbi yardım göstərdiyini xatırladaraq bildirib ki, “Ukraynanın təhlükəsizliyi NATO-nun təhlükəsizliyidir”. Ukraynanın NATO üzvlüyünə dair suala cavab verən baş katib qeyd edib ki, prinsipcə hər ölkə müraciət edə bilər, lakin ABŞ, Macarıstan, Slovakiya və bəzi digər müttəfiqlərin mövqeyinə görə hazırkı şəraitdə konsensus yoxdur və üzvlük real görünmür.
Mümkün sülh sazişindən sonra Rusiyanın yenidən hücum etməsinin qarşısını almaq üçün təhlükəsizlik zəmanətlərinin üç mərhələdə nəzərdə tutulduğunu deyən Rutte bildirib ki, bunlara Ukrayna ordusu, Böyük Britaniya və Fransanın rəhbərlik etdiyi Könüllülər Koalisiyası və ABŞ-ın təmin edəcəyi zəmanətlər daxildir. O vurğulayıb ki, Moskva yeni hücumun ağır nəticələrə səbəb olacağını bilməlidir.
Polşa müdafiə naziri Kosiniak-Kamış isə NATO-nun şərq cinahında həyata keçirilən təşəbbüslərin regional təhlükəsizliyi gücləndirdiyini, Patriot hava hücumundan müdafiə sistemlərinin döyüşə hazır olduğunu və Ukraynada sülh perspektivlərinə daha nikbin yanaşıldığını bildirib.
Mənbə: Ensonhaber