Misirlə Qəzza zolağını birləşdirən Rəfah sərhəd keçidinin uzun fasilədən sonra yenidən açılması bölgədə humanitar vəziyyətlə bağlı ümidləri qismən artırıb. Xarici mənbələrin məlumatına görə, keçidin fəaliyyətə başlaması nəticəsində bir qrup fələstinli Qəzzaya daxil olub, ağır vəziyyətdə olan xəstələr isə tibbi müalicə üçün Misir ərazisinə təxliyə edilib.
Rəsmi qurumlar bildirirlər ki, keçiddən keçid prosesi ciddi nəzarət altında həyata keçirilir və hazırda yalnız humanitar məqsədli hərəkətə icazə verilir. Ticarət yüklərinin və genişmiqyaslı sərnişin axınının hələlik mümkün olmadığı vurğulanır. BMT və beynəlxalq humanitar təşkilatlar Rəfah keçidinin açılmasını mülki əhalinin həyat şəraitinin yaxşılaşdırılması baxımından vacib addım kimi qiymətləndirir.
Bununla yanaşı, müşahidəçilər qeyd edirlər ki, Qəzzada davam edən gərginlik, tibbi ləvazimat və əsas ehtiyac mallarının çatışmazlığı hələ də ciddi problem olaraq qalır. Humanitar təşkilatlar sərhəd keçidinin davamlı və tam şəkildə açılmasının bölgədəki böhranın yüngülləşdirilməsi üçün vacib olduğunu bildirirlər.
Mənbə: ApNews