Sabunçu rayonundan şəhər istiqamətinə hərəkət edən vətəndaşlar Bugun.tv -yə müraciət ediblər.
Onların şikayəti səhər saatlarında, işə gedərkən yolda yaranan problemdir. Beləki, vətəndaş Gülnar Həsənovanın sözlərinə görə, hər gün eyni vaxtda Sabunçu keçidi adlanan hissədə yollar 30 dəqiqə bağlanır. Bu da nəqliyyatdan istifadə edənləri işə gecikdirir və haqlı narazılıq yaradır. Nə sürücülər, nə də sərnişinlər bunun səbəbini bilmirlər. Onlar problemin aradan qaldırılmasını istəyirlər.
Məsələ ilə bağlı Bakı Şəhər Dövlət Yol Polis idarəsi ilə əlaqə yaradıb, sözügedən yolun hansı səbəbdən bağlanması ilə maraqlandıq. Faktı təsdiqləyən baş inspektor Araz Əsgərli bildirdi ki, müəyyən vaxtlarda sıxlıqların, düyün nöqtəsinin yaranmasının əsas səbəbi bir istiqamətdə hərəkət edən avtobusların eyni anda dayanacağa yaxınlaşmasıdır. Bu zaman yolun hərəkət istiqaməti zəbt olunur. Bu da sözügedən gecikmələri orataya çıxardır”.
A.Əsgərli problemin aradan qaldırılması və yolun tənzimlənməsi məqsədi ilə əraziyə xidmət əməkdaşlarının təyin edildiyini bildirib.