ABŞ senatoru Bernie Sanders İsrailə silah satışının qarşısının alınması məqsədilə yeni qanun layihəsi təqdim etməyə hazırlaşır.
Məlumata görə, müstəqil senator Qəzzada baş verən hadisələrə diqqət çəkərək, ABŞ-ın İsrailə hərbi dəstəyinin dayandırılmasının vacibliyini vurğulayıb. Sanders bildirib ki, bu həftə İsrail ordusuna təxminən yarım milyard dollar dəyərində bomba və texnika satışının qarşısını almaq üçün Senatda səsvermənin keçirilməsinə çalışacaq.
Senator çıxışında İsrailin Baş naziri Binyamin Netanyahu hökumətini sərt tənqid edərək, Qəzzada baş verənləri “soyqırımı” kimi qiymətləndirib və ABŞ vergi ödəyicilərinin bu siyasəti maliyyələşdirməməli olduğunu qeyd edib.
Xatırladaq ki, Sanders daha əvvəl də İsrailə yüz milyonlarla dollar dəyərində silah satışının bloklanması ilə bağlı oxşar təşəbbüslə çıxış etmiş, lakin ABŞ Senatında bu təklif qəbul olunmamışdı.
Qeyd edək ki, son dövrlərdə xüsusilə Demokratlar arasında İsrailə silah tədarükünün dayandırılması və bölgədə hərbi əməliyyatlara dəstəyin azaldılması ilə bağlı çağırışlar artmaqdadır.
Mənbə: TrtHaber