Cin Xalq Respublikasının (ÇXR) Sədri Si Cinpin Tayvanın yeni liderini seçməsinə iki həftə qalmış bəyan edib ki, “Tayvanı Çindən ayırmaq cəhdlərinin qarşısı qətiyyətlə alınacaq”.
Bugun.tv Çinin rəsmi Sinxua xəbər agentliyinə istinadla xəbər verir ki, yanvarın 13-də Tayvanda prezident və parlament seçkiləri keçiriləcək və adanın Çinlə münasibətlərinin perspektivləri seçkiqabağı kampaniyanın əsas müzakirə mövzusudur.
Keçmiş Çin lideri Mao Tszedunun anadan olmasının 130-cu ildönümünə həsr olunmuş simpoziumda çıxış edən Si Cinpin bildirib ki, “vətənin tamamilə yenidən birləşməsi qarşısıalınmaz tendensiyadır”. O əlavə edib ki, Çin iki tərəf arasında inteqrasiyanı dərinləşdirməli, Tayvan boğazı boyunca münasibətlərin sülh yolu ilə inkişafını təşviq etməli və “hər hansı bir şəkildə Tayvanı Çindən ayırmağın qarşısını qətiyyətlə almalıdır”.
Çin liderinin çıxışında Tayvana qarşı güc tətbiqindən bəhs edilməyib, baxmayaraq ki, Çin bu ehtimalı heç vaxt istisna etməyib.
Rəsmi Pekin bildirir ki, Tayvan seçkiləri Çinin daxili işidir, lakin ada xalqı müharibə və sülh arasında seçim qarşısındadır. Son bir il yarım ərzində Çin Tayvan ətrafında iki böyük hərbi təlim keçirib, həmçinin müntəzəm olaraq Tayvan boğazına döyüş gəmiləri və döyüş təyyarələri göndərir. Çin hökuməti dəfələrlə Tayvanın növbəti prezidenti ola biləcək hakim Demokratik Tərəqqi Partiyasından (DPP) Lai Çinq-Teni təhlükəli separatçı kimi pisləyib və onun danışıqlara çağırışlarını rədd edib. Həm DPP, həm də Tayvanın əsas müxalifət partiyası olan Kuomintang (KMT) ənənəvi olaraq Çinlə sıx əlaqələrə üstünlük verir, lakin Pekinə meyilli olmasını inkar edir. Onların liderləri adanın xalqının öz gələcəyi ilə bağlı qərar verə biləcəyini deyirlər.