Siyasi ekspert Məhəmməd Əsədullazadə Yaxın Şərqdə davam edən hərbi gərginliklə bağlı sosial media hesabında diqqətçəkən açıqlama verib.
Ekspert bildirib ki, Birləşmiş Ərəb Əmirlikləri, Qətər və Küveyt İran əleyhinə hərbi əməliyyatlarda dolayı şəkildə iştirak edir. Onun sözlərinə görə, bu ölkələr öz ərazilərini və hərbi imkanlarını istifadə etməyə şərait yaratmaqla faktiki olaraq münaqişənin tərəfinə çevriliblər.
M. Əsədullazadə vurğulayıb ki, əgər bir ölkənin ərazisindən raket zərbələri və ya hərbi aviasiya hücumları həyata keçirilirsə, bu, həmin ölkənin müharibədə iştirak etməsi deməkdir. Bu baxımdan, İranın körfəz ölkələrinə qarşı cavab hücumları etməsini ekspert “gözlənilən nəticə” kimi qiymətləndirib.
O, həmçinin bəzi ərəb ölkələrinin “İran niyə bizə hücum edir?” kimi mövqeyini tənqid edərək bunu qeyri-səmimi yanaşma kimi dəyərləndirib.
Ekspert əlavə edib ki, İranda hakimiyyət strukturlarında mühüm rol oynayan SEPAH sərt və radikal xətt yürüdür və bu, regionda gərginliyin artmasına səbəb olur.
M. Əsədullazadənin fikrincə, ABŞ-ın bu müharibə çərçivəsində İranda rejim dəyişikliyinə nail olması qısa müddətdə real görünmür və belə bir ssenari uzunmüddətli qarşıdurma tələb edə bilər.