Beynəlxalq reytinq agentliyi S&P Global Ratings Azərbaycan və Ermənistan arasında normallaşma prosesinin ilkin mərhələsinin Cənubi Qafqazda regional əlaqələrin yaxşılaşmasına müsbət təsir göstərdiyini açıqlayıb.
Qurumun yaydığı hesabatda qeyd olunur ki, tərəflər arasında gərginliyin azalması və diplomatik kanalların açıq qalması nəqliyyat-kommunikasiya xətlərinin bərpası üçün əlverişli şərait yaradır. Bu isə regionun tranzit və logistika imkanlarını artırmaqla yanaşı, xarici investorlar üçün risklərin azalmasına səbəb olur.
Sənəddə vurğulanır ki, yekun sülh sazişinin imzalanması iqtisadi sabitliyi daha da möhkəmləndirə və regional əməkdaşlığı genişləndirə bilər. Bununla belə, prosesin tam başa çatmaması müəyyən risklərin hələ də qalmasına işarə edir.
Analitiklər hesab edir ki, davamlı sülh perspektivi Cənubi Qafqazda maliyyə dayanıqlığını artırmaqla yanaşı, beynəlxalq reytinqlərə də müsbət təsir göstərə bilər.
Mənbə: Bakı.Xeber