Bugun.tv xəbər verir ki, ötən il işıq üzü görən və trenddə birinci olan seriallardan biri də “Squid game” filmidir. Düzdür bu filmi “hamı sevir” demək olmaz. Amma bəyənənlər kifayət qədər var. Filmdəki adrenalin dolu oyunlar bir çox ölkələrdə gənclər üçün təşkil olunur. Elə Azərbaycanda da bu oyunu oynamaq mümkündür.
Qırmızı kombinzonlu adamlar, yaşıl formalı iştirakçılar. Bəli, söhbət “Squid game” serialından gedir. Bu film 2021-ci ildə yayımlanıb və qısa müddət ərzində ən çox izlənilən seriallar arasında birinci olub. Serialda oynanılan oyunlar isə insanların diqqətini xüsusi ilə cəlb edib.
Oyun serialdakı kimi eyni ssenari əsasında qurulub. 2 saat davam edən mübarizə 6 mərhələdən ibarətdir. Burada 4 nəfərdən 40 nəfərədək oyunçu iştirak edə bilər.
Təlimatçı Novruz Mehdiyevin sözlərinə görə, iştirakçılar qeydiyyata yaxınlaşıb, sənəd imzalayırlar. Özləri haqda məlumat yazırlar. “Qaydalarımızla tanış olurlar və daha sonra oyun başlayır. Öncə kazarmaya keçirlər. Müəyyən bir vaxt orada qalırlar. Qaydalara qulaq asırlar. Ondan sonra ilk oyuna daxil olurlar”.
İlk oyun yaşıl və qırmızı işıq adlanır. Yaşıl işıq deyildikdə hərəkət etmək olar, qırmızı işıqda isə hərəkət etmək qadağandır. Əks təqdirdə uduzursuz. “Oyunumuzda iki can verilir. Yəni serialda əgər iki canları olurdusa, burada 2 can verilir. Hər hansı bir oyunda məğlub olanda 1 canın artıq itirmiş hesab edilir. Daha sonra onlar yönəlirlər təzədən kazarmaya. Qeyd etmək istəyirəm ki, bizim oyunumuzda serialdakı kimi əsgərlər olur. Onlar da eyni uniformada – qırmızı kombinizonda olurlar və iştirakçıların qaydalara riayət etməsinə nəzarət edirlər”.
İştirakçıların oyunlararası dincəldikləri otaq kazarma adlanır. 10 dəqiqəlik fasilədən sonra növbəti oyun başlayır. 2-ci oyun isə kəndirdartmadır. Komandalar bir-birilərinə qarşı mübarizə aparır. Növbəti oyunlar isə eyni ilə filmdəki kimi “Kambo”, “Fiqurlu peçenye”, “Ölüm körpüsü” və son olaraq “Kalmar”dır.
Novruz Mehdiyev deyir ki, ölüm körpüsünə daxil olmamışdan qabaq, fərq etməz hansı iştirakçının neçə canı var. “Orda məğlub olan iştirakçı tamamilə oyunu tərk edir. Ondan sonra final başlayır. Kalmar oyununda həmin şəxs halqaları konuslara atmalıdırlar. Hansı iştirakçı bunu tez bacararsa, o artıq “Squid game” oyununun qalibi hesab olunur”.
Bu cür oyunların keçirilməsi filmi daha da unudulmaz edir. Düzdü serial psixoloji cəhətdən ağır olsa da, oyunların əyləncəli təşkili bu gərginliyi azaldır.