ABŞ-ın vasitəçiliyi ilə Suriya və İsrail arasında keçirilən danışıqların növbəti mərhələsi Fransanın paytaxtı Parisdə baş tutacaq. Görüşlərdə Suriya tərəfini xarici işlər naziri Əsəd Həsən Şeybani başda olmaqla nümayəndə heyəti təmsil edəcək. Heyətin tərkibinə Baş Kəşfiyyat İdarəsinin rəhbəri Hüseyn əs-Səlame də daxildir.
Suriya rəsmi xəbər agentliyi SANA-nın hökumət mənbələrinə istinadən verdiyi məlumata görə, danışıqların yenidən başlanması Dəməşqin “milli hüquqlarının bərpası” məsələsində qəti mövqeyini əks etdirir.
Müzakirələrin əsas gündəmini 70-ci illərdəki Qüvvələrin Ayrılması Sazişinin yenidən aktivləşdirilməsi təşkil edir. Bu çərçivədə İsrail qüvvələrinin 8 dekabr 2024-cü ildən əvvəlki mövqelərinə çəkilməsi hədəflənir.
Xəbərdə bildirilib ki, danışıqlarda Suriyanın tam suverenliyini prioritet sayan balanslaşdırılmış təhlükəsizlik razılaşması müzakirə olunacaq. Eyni zamanda, Suriyanın daxili işlərinə hər cür müdaxilənin qarşısının alınmasını təmin edəcək mexanizmlər də gündəmdə olacaq.
Məlumata görə, Parisdə planlaşdırılan bu görüşlər iki gün davam edəcək və tərəflər arasında aparılan prosesin beşinci raundu olacaq. Danışıqların əsas məqsədi Suriyanın cənubunun hərbsizləşdirilməsi və İsrailin nəzarətə götürdüyü Suriya ərazilərindən geri çəkilməsini nəzərdə tutan yeni təhlükəsizlik razılaşmasına nail olmaqdır.
Mənbə: Trthaber.com