Gənc şahmatçımız, perspektivli oyun tərzi ilə son zamanlar adından söz etdirən Kənan Dadaşov, bu günlərdə keçirilən beynəlxalq səviyyəli “Caucasus Online Rapid Cup 2025” turnirində prinsipial rəqibi, Ermənistan təmsilçisi Aram Mikayelyan üzərində parlaq və inamlı qələbə qazanaraq şahmat ictimaiyyətində böyük maraq doğurub.
142 iştirakçının qatıldığı bu prestijli turnirdə dünyanın müxtəlif ölkələrindən olan şahmatçılar rapid (15+10) formatında mübarizə aparır. Turnirin VII turunda keçirilən qarşılaşmada Kənan Dadaşov qaralarla oynayaraq, erməni rəqibin 1.e4 açılışına qarşı Siciliya müdafiəsi (1…c5) ilə cavab verib. Oyun erkən mərhələdən etibarən taktiki mürəkkəbliklərlə zəngin olub və hər iki şahmatçının hazırlıq səviyyəsi yüksək görünüb.
Ancaq oyunun ortalarında, xüsusilə 17–25-ci gedişlər arasında Dadaşovun göstərdiyi dəqiqlik və mərkəzdəki fəallığı onun üstün mövqe əldə etməsinə səbəb olub. Rəqibin səhv olaraq 33-cü gedişdə filini açıq xəttə qoyması, Dadaşova keyfiyyət qazanmaq fürsəti verib. Nəticədə Aram Mikayelyan 47-ci gedişdə təslim olmaq məcburiyyətində qalıb.
Kənan Dadaşov hazırda ümumi hesabda 4,5 xalla ilk 10-luqda yer alır. Bu qələbə təkcə idman uğuru kimi deyil, həm də milli qürurun göstəricisi, regiondaxili idman rəqabətində psixoloji üstünlüyün əldə olunması baxımından xüsusi əhəmiyyət daşıyır.