Taylandda turistlərin ən çox bilmədiyi və ən qəribə hesab edilən qanunlardan biri pul əskinası ilə bağlıdır.
Ölkənin qanunvericiliyinə görə, Tayland valyutası olan bahtın üzərində kralın təsviri olduğu üçün pulun təhqir edilməsi ağır hüquqi məsuliyyət yarada bilər.
Məlumata görə, Taylandda pul əskinasını yerə atmaq, tapdalamaq və ya qəsdən cırmaq “monarxiyanın təhqiri” kimi qiymətləndirilə bilər. Bu isə ölkədə ciddi şəkildə tətbiq olunan “lese majeste” (kral ailəsinə qarşı hörmətsizlik) qanunu çərçivəsində araşdırılır.
Hüquqşünasların fikrincə, belə hallar xüsusilə turistlər üçün təhlükəli ola bilər, çünki insanlar bəzən pulun uçmaması üçün ayaqları ilə üzərinə basırlar. Lakin Taylandda bu davranış sadə hərəkət deyil, dövlətin və kral ailəsinin simvoluna hörmətsizlik kimi qəbul edilir.
Ekspertlər turistlərə Taylandda pul ilə ehtiyatlı davranmağı və bu kimi qaydalara ciddi yanaşmağı tövsiyə edirlər. Bu qanun Taylandın mədəniyyətində monarxiyanın nə qədər mühüm yer tutduğunu göstərir.
Mənbə: BBC