ABŞ Prezidenti Donald Tramp İran ətrafında vəziyyətin qeyri-müəyyən olduğunu bildirərək, ABŞ-ın bölgədə güclü hərbi mövcudluğa malik olduğunu açıqlayıb. Tramp Amerikanın Axios xəbər saytına verdiyi müsahibədə deyib ki, ABŞ-ın İran yaxınlığında “devasa hərbi donanması” yerləşdirilib və Tehran razılaşma əldə etmək niyyətindədir.
Tramp vurğulayıb ki, Vaşinqton İranda baş verən prosesləri diqqətlə izləyir. O, daha əvvəl etdiyi açıqlamalarda etirazçıların edam edilməsi halında ABŞ-ın sərt addımlar atacağını bildirmişdi. İranda isə iqtisadi səbəblərlə başlayan etiraz aksiyaları tədricən rejim əleyhinə nümayişlərə çevrilib.
Bu arada ABŞ Mərkəzi Komandanlığı (CENTCOM) USS Abraham Lincoln təyyarədaşıyan gəmisinin Yaxın Şərqə yerləşdirildiyini təsdiqləyib. Bildirilib ki, gəmi regional təhlükəsizlik və sabitliyin təmin olunması məqsədi daşıyır.
ABŞ-ın Bağdaddakı səfirliyi də Trampın “İranı çox yaxından izləyirik” sözlərini xatırladaraq Vaşinqtonun bölgədəki vəziyyətə ciddi yanaşdığını bəyan edib.
Mənbə: Ensonhaber