ABŞ Prezidenti Donald Trump iqtisadi sanksiyaların artırıldığı Kubanın çox yaxın zamanda “çökəcəyini” iddia edib.
Tramp CNN telekanalına telefon bağlantısı ilə verdiyi açıqlamada Kuba ilə bağlı yeni fikirlər səsləndirib. O, prezidentliyinin ikinci dövründə əldə etdiyi uğurları vurğulayaraq, Kubanın tezliklə razılaşma əldə etmək istəyəcəyini bildirib.
ABŞ lideri deyib ki, Kuba ilə mümkün razılaşma prosesinə ABŞ dövlət katibi Marco Rubio cəlb olunacaq və hazırda bu məsələ onların diqqət mərkəzindədir.
Tramp bildirib: “50 ildir bu anı gözləyirəm və indi Kuba demək olar ki, mənim qucağıma düşüb”.
Onun sözlərinə görə, bu istiqamətdə proses yaxşı irəliləyir.
Bir gün əvvəl Ağ Evdə çıxış edən Tramp amerikalı kubalıların vətənlərinə qayıtmasının “yalnız zaman məsələsi” olduğunu da qeyd edib.
ABŞ prezidenti həmçinin Tehrana qarşı həyata keçirilən hücumların uğurlu olduğunu iddia edib və İran rəhbərliyinin sonda geri çəkiləcəyini bildirib. Tramp bu fikri səsləndirdikdən sonra “Kuba da çökəcək” ifadəsini işlədib.
Qeyd edək ki, Tramp yanvarın 30-da Kubaya neft satan və ya təmin edən ölkələrdən ABŞ-a gətirilən mallara gömrük rüsumu tətbiq edilməsini nəzərdə tutan prezident fərmanını imzalayıb. Ağ Ev bu qərarın ABŞ-ın milli təhlükəsizlik və xarici siyasət maraqlarını qorumağa yönəldiyini açıqlayıb.
Tramp fevralın 1-də Kuba ilə neft tədarükünün tənzimlənməsi barədə danışıqların başlandığını desə də, Kuba hakimiyyəti bu iddianı təkzib edib.
Mənbə: TrtHaber