Bugun.tv xəbər verir ki, ABŞ Prezidenti Donald Tramp mal ətinin mənşə ölkəsinin etiketlənməsi ilə bağlı yeni sərəncam imzalamağa hazırlaşır.
Reuters-in məlumatına görə, sərəncamın cümə günü, sentyabrın 4-də özəl mərasim zamanı imzalanması planlaşdırılır. Ağ Ev məsələ ilə bağlı hələ rəsmi açıqlama verməyib.
Söhbət istehlakçıların aldıqları mal ətinin hansı ölkədən gəldiyini daha aydın şəkildə bilməsinə imkan verəcək etiketləmə qaydalarından gedir. Hazırkı qaydalara əsasən, “ABŞ məhsuludur” ifadəsinin istifadəsinə müəyyən məhdudiyyətlər tətbiq olunur və bu etiket yalnız tamamilə ABŞ-da emal edilən mal əti üçün könüllü şəkildə istifadə edilə bilər.
Məsələ ABŞ-da mal əti qiymətlərinin yüksəlməsi fonunda gündəmə gəlib. Tramp administrasiyası daha əvvəl qiymətləri azaltmaq məqsədilə gömrük rüsumları daha aşağı olan ölkələrdən mal əti idxalının müvəqqəti artırılmasına yönəlmiş qərar qəbul etmişdi.
ABŞ-dakı bir sıra fermer və maldarlıq təşkilatları isə idxalın artmasının yerli istehsalçılara zərər verə biləcəyindən narahatdır. Bir çox fermer mənşə ölkəsinin məcburi şəkildə göstərilməsini dəstəkləyir.
Mənbə: Reuters