Bugun.tv xəbər verir ki, “Azərbaycanın müstəqilliyi əbədidir, sarsılmazdır” – deyən Ulu Öndər Heydər Əliyevin anım günüdür .
Hər zaman olduğu kimi, bu gün ölkədə dərin hörmət və ehtiramla yad olunur.
Dövlətimizin qurucusu kimi tanınan Heydər Əliyevin həyat yolu, milli ideologiyaya verdiyi töhfələr və Azərbaycan dövlətçiliyinin möhkəmlənməsi istiqamətində gördüyü işlər bu gün də ölkənin inkişafının əsas ideya dayağı kimi qiymətləndirilir.
Heydər Əliyevin siyasi irsi Azərbaycanın bünövrəsini möhkəmləndirən, onu bölgənin lider dövlətinə çevirən ideoloji xətt kimi daim yaşamaqdadır.
“Mən fəxr edirəm ki, azərbaycanlıyam” çağırışı bu gün də milli həmrəyliyin, vətənpərvərliyin rəmzi kimi səslənir. Ulu Öndərin qurduğu müasir dövlət idarəçiliyi modeli, iqtisadi islahatları və ordu quruculuğu sahəsindəki xidmətləri hər zaman xüsusi olaraq qeyd edilir.
Son illərin uğurları Heydər Əliyevin əsasını qoyduğu xəttin davamı kimi qiymətləndirilir.
“Azərbaycan dünyaya günəş kimi doğacaq” deyən Ulu Öndərin arzularını bu gün Prezident İlham Əliyevin həyata keçirdiyi siyasət reallaşdırır. Dövlət başçısının qətiyyətli rəhbərliyi nəticəsində torpaqlarımızın işğaldan azad edilməsi, regional gücümüzün möhkəmlənməsi və Azərbaycanın suverenliyinin tam bərpası Heydər Əliyev ideyalarının parlaq təcəssümü kimi tarixə düşüb. Və onun müəyyənləşdirdiyi yol bu gün də Azərbaycanın sabahına yön verən ən etibarlı strateji irs olaraq yaşayır.