Ukrayna öz ərazilərini Rusiya işğalçılarına verməyəcək. Ərazi məsələsi ilə bağlı cavab Ukrayna Konstitusiyasında var.
Bugun.tv bu barədə Ukrayna Prezidenti Volodimir Zelenskinin bəyanatına istinadla xəbər verir.
“Ukraynanın ərazi məsələsinin cavabı artıq Ukrayna Konstitusiyasında var. Bundan heç kim yayına bilməyəcək və ya kənara çıxa bilməyəcək. Ukraynalılar öz torpaqlarını işğalçıya verməyəcək”, -deyə dövlət başçısı bildirib.
Zelenski vurğulayıb ki, Ukrayna sülhə gətirib çıxaracaq real qərarlara hazırdır. Lakin Prezidentin dediyi kimi, Ukrayna əleyhinə və onun iştirakı olmadan veriləcək istənilən qərar həm də sülhə qarşı olan addımdır.
“Ukraynasız bu qərarlar heç bir nəticə verməyəcək. Bunlar ölü qərarlardır, heç vaxt işləməyəcək. Bizim hamımıza insanların hörmət edəcəyi real, həqiqi sülh lazımdır. Biz Prezident Tramp ilə, bütün tərəfdaşlarla birlikdə real və ən əsası, davamlı – Moskvanın istəkləri üzündən pozulmayacaq sülh üçün işləməyə hazırıq”, – deyə Zelenski əlavə edib.
Xatırladaq ki, bir gün əvvəl ABŞ Prezidenti Donald Tramp Rusiya Federasiyası ilə mümkün “ərazi mübadiləsi”nə, eləcə də bəzi ərazilərin Ukraynaya qaytarılması ehtimalını diqqətə çatdırıb: “Bu, çox çətindir, lakin biz bəzi əraziləri qaytarmağa hazırlaşırıq. Bəzi ərazi mübadilələri edəcəyik. Hər iki tərəfin xeyrinə bəzi ərazi mübadilələri olacaq”.
Tramp Vladimir Putinlə görüşün tarixini və yerini də açıqlayıb. Onlar avqustun 15-də Alyaskada görüşəcəklər.
Mənbə: AZƏRTAC