Bugun.tv – xəbər verir ki, bu gün Azərbaycanda Beynəlxalq Ana Dili Günü qeyd olunur.
Bu münasibətlə Milli Məclisin deputatı, iqtisadçı Vüqar Bayramov ana dilinin əhəmiyyəti ilə bağlı sosial media hesabında paylaşım edib.
Deputat bildirib ki, ana dili hər bir xalqın milli kimliyini müəyyənləşdirən ən əsas amillərdən biridir. Onun sözlərinə görə, dil təkcə ünsiyyət vasitəsi deyil, eyni zamanda xalqın tarixi yaddaşını, mədəniyyətini, ədəbiyyatını və milli-mənəvi dəyərlərini yaşadan fundamental sütundur.
Vüqar Bayramov qeyd edib ki, Azərbaycan dili əsrlər boyu formalaşaraq zənginləşib və bu gün müstəqil dövlətimizin əsas atributlarından biri kimi qorunur və inkişaf etdirilir. Deputat vurğulayıb ki, ana dilinə sevgi və hörmət hər bir vətəndaşın mənəvi borcudur.
O, xüsusilə gənc nəslin milli-mənəvi dəyərlərə bağlı ruhda böyüməsinin vacibliyini diqqətə çatdıraraq bildirib ki, dilimizin saflığının qorunması, düzgün istifadəsi və gələcək nəsillərə ötürülməsi cəmiyyətin ümumi məsuliyyətidir.
Deputat paylaşımının sonunda vətəndaşları ana dilini sevməyə və onu qorumağa çağırıb.
