Yaxın Şərqdə ABŞ, İsrail və İran arasında davam edən hərbi qarşıdurma regionda gərginliyi daha da artırıb. The Guardian nəşrinin məlumatına görə, son hücumlar fonunda Birləşmiş Ərəb Əmirlikləri təhlükəsizlik səbəbindən hava məkanını müvəqqəti bağlasa da, daha sonra yenidən açıb.
Məlumata əsasən, qarşılıqlı raket və dron hücumları regionun bir neçə ölkəsini əhatə edib. Xüsusilə İraqın paytaxtı Bağdadda yerləşən ABŞ səfirliyinin olduğu “Yaşıl zona”nın atəşə tutulduğu bildirilir. Eyni zamanda İsrailin Tehrana və Livana zərbələr endirdiyi qeyd olunur.
Digər tərəfdən, ABŞ prezidenti Donald Trump müttəfiqləri Hörmüz boğazında əməliyyatlara qoşulmağa çağırsa da, bir sıra NATO ölkələri bu təşəbbüsü dəstəkləməkdən imtina edib.
Mütəxəssislər bildirir ki, regionda artan gərginlik qlobal enerji bazarlarına da ciddi təsir göstərib. Belə ki, Hörmüz boğazında risklərin artması fonunda neft qiymətləri kəskin yüksəlib və beynəlxalq bazarlarda qeyri-müəyyənlik güclənib.
Analitiklər hesab edir ki, qarşıdurmanın davam etməsi qlobal iqtisadiyyata və enerji təhlükəsizliyinə ciddi risklər yarada bilər.
Mənbə: The Guardian