Hindistanın paytaxtı Yeni Delhidə hökumət əleyhinə keçirilən genişmiqyaslı etiraz aksiyasında minlərlə insan iştirak edib.
Bugun.tv xəbər verir ki, etirazçılar parlamentə yürüş edərək təhsil naziri Dharmendra Pradhanın istefasını və imtahan sızmaları ilə bağlı məsuliyyət daşıyan şəxslərin cəzalandırılmasını tələb ediblər.
Məlumata görə, polis aksiyanın keçirilməsinə icazə verməyib və parlamentə gedən yollar bağlanıb. Etirazçılar təhlükəsizlik qüvvələrinin qurduğu barrikadaları keçməyə cəhd göstərdikdən sonra polis gözyaşardıcı qaz və dəyənəklərdən istifadə edib. Hadisə zamanı bir sıra etirazçılar saxlanılıb.
Aksiya son aylarda formalaşan və sosial şəbəkələrdə milyonlarla dəstək qazanan gənclər hərəkatı tərəfindən təşkil olunub. Hərəkat ölkədə təhsil sistemində korrupsiya, imtahan suallarının sızdırılması və gənclərin məşğulluq problemlərinə etiraz edir. Hökumət nümayəndələri etiraz liderləri ilə dialoqa hazır olduqlarını bildirsələr də, nümayişçilər konkret addımlar atılana qədər aksiyaları davam etdirəcəklərini açıqlayıblar.
Mənbə: The Guardian