Yeni il dünyanın müxtəlif ölkələrində fərqli adət-ənənələr və maraqlı inanclarla qeyd olunur. Xarici mənbələrdə dərc edilən məlumatlara görə, yeni ilin qarşılanması ilə bağlı bəzi faktlar həm tarixi, həm də mədəni baxımdan diqqətçəkicidir.
Məsələn, İspaniyada və Latın Amerikasının bir sıra ölkələrində insanlar saat gecə yarısını vurarkən 12 üzüm dənəsi yeməklə yeni ildə uğur və rifah arzulayırlar. Filippində isə yeni ili qarşılayarkən dairəvi formalı əşyalar — paltar naxışları, meyvələr və aksesuarlar seçilir. Bu adət bolluq və maddi sabitliyin rəmzi hesab olunur.
Danimarkada insanlar yeni il gecəsi dost və qohumlarının qapısının qarşısında köhnə qab-qacağı sındırırlar. Bu, pis enerjidən qurtulmaq və yeni ilə uğurla başlamaq mənası daşıyır. Şotlandiyada isə “First Footing” adlı ənənəyə görə, yeni ildə evə ilk daxil olan şəxsin tünd saçlı olması uğur gətirir.
Maraqlı faktlardan biri də budur ki, dünya əhalisinin böyük bir hissəsi yeni ili fərqli tarixlərdə — Ay və Günəş təqvimlərinə əsasən qeyd edir. Bu da yeni ilin qlobal miqyasda necə müxtəlif şəkildə qarşılandığını göstərir.
Mənbə: Good Housekeeping