Yeni Zelandiyanın Şimal adasının bir sıra bölgələrində güclü yağışlar nəticəsində sel və torpaq sürüşmələri qeydə alınıb. Təbii fəlakətlər səbəbilə itkin düşən şəxslərin tapılması üçün axtarış-xilasetmə əməliyyatları davam etdirilir.
Şimal adasına bağlı Bay of Plenty bölgəsində, Maunganui dağının ətəyində yerləşən düşərgə ərazisində yerli vaxtla saat 09:30 radələrində torpaq sürüşməsi baş verib. Polis rəsmisi Tim Anderson itkin düşənlərin sayının “birrəqəmli” olduğunu açıqlayıb, lakin ümumilikdə neçə nəfərin fəlakətdən zərər çəkdiyi barədə məlumat verməyib.
Anderson Papamoa bölgəsində də torpaq sürüşməsi qeydə alındığını və iki itkin şəxs üçün axtarış işlərinin davam etdiyini bildirib.
Yeni Zelanda Yanğınsöndürmə və Fövqəladə Hallar Xidmətinin nümayəndəsi William Pike torpaq sürüşməsindən üç saat sonra sağ qalanlara rast gəlinmədiyini qeyd edib. Ölən və ya itkin düşənlərin sayı ilə bağlı hələlik rəsmi açıqlama verilməyib.
Şimal adasının şimalında yerləşən Warkworth qəsəbəsi yaxınlığında isə bir nəfər sel sularına qapılaraq itkin düşüb. Digər bölgələrdə baş verən sel və torpaq sürüşmələri nəticəsində bir sıra yollar bağlanıb, nəqliyyatın bərpası istiqamətində işlər aparılır.
Yeni Zelanda Baş naziri Kristofer Lükson hökumətin təbii fəlakətlərdən zərər çəkənlərə dəstək göstərmək üçün fəaliyyətini davam etdirdiyini açıqlayıb.
Mənbə: Trthaber.com