Bir-birinin ardınca açıqlamalar gəldi
Ukraynanın hücumu ilə əlaqədar Zaporojya Atom Elektrik Stansiyasının soyutma sistemində yanğın baş verdiyi və stansiyanın fəaliyyəti ilə bağlı heç bir təhlükənin olmadığı bildirilib.
Rusiya tərəfindən ilhaq edilmiş Zaporojya vilayətinin qubernatoru Yevgeni Balitskiy yazılı açıqlamasında Zaporojya AES-dəki vəziyyətlə bağlı məlumat verib.
Ukrayna ordusunun artilleriya atəşi ilə həyata keçirdiyi hücum nəticəsində Zaporojya AES-in soyutma sistemində yanğın baş verdiyini bildirən Balitskiy, “Stansiyada 6 blok soyuq dayanma vəziyyətindədir, partlayış və ya başqa bir hadisə yoxdur” deyib.
Balitskiy elektrik stansiyasında və onun yerləşdiyi şəhərdə radiasiya səviyyəsinin normal səviyyədə olduğunu vurğulayaraq, yanğının söndürülməsi istiqamətində işlərin davam etdiyini qeyd edib.
Ukraynanın cənub-şərqindəki Zaporojya Atom Elektrik Stansiyası Avropanın ən böyük atom elektrik stansiyasıdır.
Xatırladaq ki, elektrik stansiyası 2022-ci ilin martında ruslar tərəfindən ələ keçirilib. Hazırda Rusiya ordusunun nəzarətində olan elektrik stansiyasının ətrafında artilleriya hücumları olsa da, Ukrayna və Rusiya hücumlarda bir-birini günahlandırır.
Mənbə: Haber Global