“Türkiyə Vladimir Putin və ukraynalı həmkarı Volodimir Zelenski arasında danışıqların təşkili üçün səylərini davam etdirəcək”.
Bugun.tv xəbər verir ki, bunu prezident Rəcəb Tayyib Ərdoğan Ankarada Türk Dövlətləri Təşkilatının fövqəladə Zirvə toplantısı zamanı bildirib.
“Bizim vasitəçiliyimizlə mümkün olan taxıl və əsirlərin mübadiləsi ilə bağlı sövdələşmə göstərdi ki, Ukrayna münaqişəsinin tərəfləri ümumi dil tapmağa qadirdir. Türkiyə Ukraynada ədalətli sülhün tərəfdarıdır. Mən Vladimir Putin və Volodimir Zelenski ilə daimi əlaqədə olmaqda davam edirəm. Onlar arasında danışıqların təşkili üçün səylərimi göstərəcəm”, – Ərdoğan bildirib.
Ankara dəfələrlə Rusiya və Ukrayna arasında danışıqlarda vasitəçi olmaq fikrini səsləndirib. Hər iki ölkənin nümayəndə heyətləri arasında məsləhətləşmələr də elə Türkiyədə baş tutub.