Bugun.tv xəbər verir ki, Kanadanın Halifax Təbiət Tarixi Muzeyində yaşayan 104 yaşlı Qus adlı quru tısbağası sidik kisəsindəki daşın götürülməsi üçün əməliyyat olunacaq. Dünyanın müxtəlif ölkələrindən insanlar ona məktublar və şəfa arzuları göndərərək dəstəklərini ifadə edirlər.
Muzeyin rəhbəri Ceff Qreyin sözlərinə görə, əməliyyat barədə məlumat yayılandan sonrakı iki həftə ərzində Qusa yüzlərlə məktub, şəfa arzusu yazılmış açıqca və müxtəlif sənət əsərləri göndərilib. Muzeyin sosial şəbəkə hesablarına isə Kanada və dünyanın başqa ölkələrindən minlərlə dəstək mesajı daxil olub.
Nəsillərin sevimlisi
1922-ci ildə yumurtadan çıxdığı güman edilən Qus dünyanın məlum olan ən yaşlı qopher tısbağası hesab olunur. O, 1942-ci ildə Floridadan 5 dollara alındıqdan sonra Təbiət Tarixi Muzeyində yaşamağa başlayıb.
Muzeyə gələnlər isti havalarda Qusun açıq sahədə, soyuq və yağışlı günlərdə isə qapalı məkanda etdiyi gündəlik gəzintiləri izləyə bilirlər. Onun ziyarətçilər arasında böyük maraq doğurması nəsillər boyu davam edir. Uşaqlıqda Qusu görən insanlar indi öz övladları və nəvələri ilə muzeyə qayıdırlar.
Əməliyyat tısbağanın qabığına zərər vermədən aparılacaq
Baytarlar Qusun sidik kisəsindəki daşı ilk dəfə 2009-cu ildə aşkar ediblər. Son müayinələr daşın böyüdüyünü və ətraf toxumalara təzyiq göstərməyə başladığını üzə çıxarıb.
Muzey rəhbərinin bildirdiyinə görə, 2009-cu ildə daşı götürmək üçün tısbağanın çanağını deşmək lazım gələrdi. Lakin baytarlıq cərrahiyyəsindəki irəliləyişlər sayəsində bu dəfə daşın Qusun ayağında açılacaq kiçik kəsik vasitəsilə çıxarılması planlaşdırılır.
Hazırda tısbağada ağrı əlamətləri müşahidə olunmasa da, müdaxilə edilmədiyi təqdirdə daşın digər orqanlara təzyiq göstərə biləcəyindən narahatlıq var. Əməliyyatın çərşənbə axşamı keçirilməsi nəzərdə tutulur. Bundan sonra Qus bir neçə həftəlik gündəlik gəzintilərinə fasilə verəcək.
Uzun ömrünün sirri
Təbiətdə qopher tısbağaları adətən təxminən 60 il yaşayır. Təhlükəsiz mühit, müntəzəm qidalanma və baytar nəzarəti Qusun ömrünün uzanmasına kömək edib. Muzey əməkdaşları onun ümumi sağlamlıq vəziyyətinin yaxşı olduğunu bildirir və əməliyyatın ona daha rahat həyat təmin edəcəyinə inanırlar.
Mənbə: TRT Haber