Bugun.tv xəbər verir ki, İran parlamentinin sədri Məhəmməd Baqer Qalibaf ölkəsinin ABŞ ilə münasibətlərin normallaşdırılmasından daha çox müharibənin dayandırılmasına və regionda təhlükəsizliyin təmin olunmasına üstünlük verdiyini bəyan edib.
Qalibaf xalqa müraciətində bildirib ki, İranın əsas məqsədi Vaşinqtonla münasibətləri bərpa etmək deyil, müharibəyə son qoymaq və Yaxın Şərqdə uzunmüddətli təhlükəsizliyə nail olmaqdır. O vurğulayıb ki, Tehran qarşı tərəfə etibar etmir.
İran parlamentinin sədri ölkəsinin yalnız hərbi və ya yalnız diplomatik yol seçdiyi barədə fikirlərin yanlış olduğunu deyib. Onun sözlərinə görə, İran vəziyyətə uyğun olaraq həm danışıqlar aparmağa, həm də öz maraqlarını müdafiə etmək üçün hərbi addımlar atmağa hazırdır.
Qalibaf son gərginliyə görə ABŞ və İsraili məsuliyyət daşımaqda günahlandırıb. O bildirib ki, ABŞ Prezidenti tərəfindən verilən bəzi açıqlamalar əvvəlki razılaşmaların ruhuna zidd olub və bu da Vaşinqtonun nə atəşkəsə, nə də dialoqa maraq göstərdiyini nümayiş etdirib.
Bəyanat İsrail və İran arasında son günlərdə baş verən qarşılıqlı hücumlar fonunda səsləndirilib. Məlumata görə, İran iyunun 7-də İsrailin şimal istiqamətinə raket zərbələri endirib. İsrail ordusu raketlərin hava hücumundan müdafiə sistemləri tərəfindən zərərsizləşdirildiyini açıqlayıb.
İranın hücumu İsrailin Beyrutda Hizbullahın obyektlərinə endirdiyi hava zərbələrindən sonra baş verib. İsrail tərəfi həmin əməliyyatın şimal bölgələrinə yönəlmiş hücumlara cavab xarakteri daşıdığını bildirib.
Daha sonra İsrail İranın qərb və mərkəzi bölgələrində yerləşən hərbi obyektlərə zərbələr endirib. Hücumlar nəticəsində Xuzistan əyalətində yerləşən neft-kimya müəssisəsinin zərər gördüyü bildirilib. Ardınca İran İsrail ərazisinə yenidən raket atəşi açıb.
Ekspertlər hesab edirlər ki, tərəflər arasında gərginliyin davam etməsi Yaxın Şərqdə təhlükəsizlik vəziyyətini daha da mürəkkəbləşdirə və regionda yeni qarşıdurma risklərini artıra bilər.
Mənbə: TASS