Çinin Şanxay şəhərində altı humanoid robotun 24 saat fəaliyyət göstərən mağazada iş qabiliyyəti sınaqdan keçirilib. Bir gün davam edən təcrübə zamanı robotlara məhsulları rəflərə düzmək, qəhvə və isti yeməklər hazırlamaq, müştərilərə xidmət göstərmək və təmizlik işlərini yerinə yetirmək tapşırılıb.
Bugun.Tv xəbər verir ki, Mail.ru-nun məlumatına görə, sınaqda iştirak edən altı robotdan yalnız dördü verilən tapşırıqların öhdəsindən gələ bilib. Digər ikisi isə gözlənilən nəticəni göstərə bilməyib.
Robotlardan biri məhsulları rəflərə düzmək üçün nəzərdə tutulsa da, mağazanın gündəlik iş tempinə uyğunlaşa bilməyib. Təmizlik işlərinə cəlb olunan digər robot isə gecə saatlarında dolu zibil qabı ilə qarşılaşdıqdan sonra fəaliyyətini düzgün davam etdirə bilməyib. O, müəyyən edilmiş marşrutdan çıxaraq mağazanın ərazisini tərk edib.
Robotların gündəlik işlərdə imkanları yoxlanılır
Bu sınaq humanoid robotların real iş şəraitində nə dərəcədə səmərəli fəaliyyət göstərə bildiyini qiymətləndirmək məqsədi daşıyıb. Nəticələr göstərir ki, robotlar bəzi tapşırıqları yerinə yetirsələr də, gözlənilməz vəziyyətlərdə hələ də çətinliklərlə üzləşirlər.
Mütəxəssislər üçün əsas məsələlərdən biri robotların insan müdaxiləsi olmadan müxtəlif şəraitə uyğunlaşmaq imkanlarının təkmilləşdirilməsidir.
Mənbə: Mail.ru