Bugun.tv “Science Daily” saytına istinadla xəbər verir ki, DZNE, Maqdeburq Universiteti və Tübingen Universitetinin Hertie Kliniki Beyin Tədqiqatları İnstitutunun alimləri ultra yüksək dəqiqlikli MRT skanları ilə “ilkin somatosensor korteks”in laylı quruluşunu araşdırıblar. Nəticələrə əsasən, toxunma siqnallarını emal edən bu sahədə bəzi təbəqələr, xüsusilə dərin qatlar yaşla əlaqədar incəlsə də, orta və yuxarı qatlar sabit qalır və ya qalınlaşır. Bu, beyin plastikasının (nevroplastikliyin) yaşlılıqda da davam etdiyini göstərir. Alimlər bunun səbəbini həmin qatların gündəlik həyatda daha çox stimullaşması ilə əlaqələndiriblər. Tədqiqat, həmçinin göstərib ki, dərin təbəqələrdə incəlmə olsa belə, mielinin miqdarı artır. Bu, sinir siqnallarının modulyasiyasını yaxşılaşdıraraq müəyyən degenerasiyaya qarşı kompensasiya mexanizmi yaradır. Araşdırma tez-tez istifadə olunan sensor-motor bacarıqların yaşlılıqda belə qorunacağını, lakin müdaxilə edən stimullar qarşısında çətinlik yarana biləcəyini ortaya qoyur.
İnsan yaşlandıqca beynin bəzi hissələri güclənir
