ABŞ-ın Zanskar Geothermal and Minerals şirkəti süni intellektin (AI) dəstəyi ilə Nevada ştatının qərbində son 30 ildə ilk dəfə kommersiya baxımından əlverişli “gizli” geotermal sistem aşkarlandığını açıqlayıb.
Şirkət bildirir ki, həmin ərazidə səthdə heç bir geotermal əlamət – qaynar bulaq və ya buxar – olmadığı üçün yatağın müəyyən edilməsi yalnız modelləşdirmə və AI analizləri ilə mümkün olub.
Rəsmi məlumata görə, “Big Blind” adlandırılan yataqda qazılan quyulardan biri təxminən 820 metr dərinlikdə 121°C temperaturda və enerji istehsalı üçün uyğun su qatı üzə çıxarıb. Şirkət AI vasitəsilə mümkün istilik anomaliyalarını müəyyən edib və quyu qazılması üçün optimal nöqtələri seçib ki, bu da xərcləri və uğursuz qazma riskini əhəmiyyətli dərəcədə azaldıb.
Zanskar Geothermal yaxın illərdə yatağın sənaye miqyasında inkişafı üçün icazə prosesinə başlamağı planlaşdırır. Şirkət hesab edir ki, bu kəşf ABŞ-da daha çox “gizli” geotermal sistemlərin aşkarlanmasına yol açacaq və geotermal enerjinin bərpa olunan enerji bazarında rolunu gücləndirəcək.
Mənbə: Axios