Çin hökuməti ölkə daxilində fəaliyyət göstərən bəzi iri texnologiya şirkətlərinə ABŞ istehsalı olan Nvidia H200 süni intellekt çipləri üçün yeni sifarişləri dayandırmaq barədə göstəriş verib.
Məsələ ilə tanış mənbələrin bildirdiyinə görə, bu addım Çinin xarici texnologiyalardan asılılığını azaltmaq və yerli yarımkeçirici sənayesini gücləndirmək strategiyasının tərkib hissəsidir.
Xəbərdə qeyd olunur ki, H200 çipləri əsasən böyük dil modelləri, süni intellekt təlimləri və yüksək performanslı hesablama sistemlərində istifadə olunur. Çin tərəfi isə texnologiya şirkətlərini yerli istehsal AI çiplərinə üstünlük verməyə təşviq edir. Analitiklər bu qərarın ABŞ-Çin texnologiya qarşıdurmasının daha da dərinləşdiyini göstərdiyini bildirirlər.
Ekspertlərin fikrincə, bu məhdudiyyətlər Nvidia üçün Çin bazarında satışların azalması riskini yarada bilər. Eyni zamanda, qərar Çin daxilində fəaliyyət göstərən çip istehsalçıları üçün yeni imkanlar açır və ölkənin texnoloji müstəqillik məqsədlərinə xidmət edir.
Mənbə: Reuters