Avstraliyanın ən nüfuzlu ədəbiyyat tədbirlərindən biri olan Adelaide Yazıçılar Həftəsi, fələstin əsilli avstraliyalı akademik və yazıçı Randa Abdel-Fattahın proqramdan çıxarılmasından sonra genişmiqyaslı boykotla üzləşib. Aralarında Miles Franklin mükafatı laureatlarının və beynəlxalq tanınmış yazıçıların da olduğu onlarla iştirakçı etiraz əlaməti olaraq festivaldan çəkildiyini açıqlayıb.
Festivalın İdarə Heyəti cümə axşamı yaydığı bəyanatda, 2025-ci ilin dekabrında Bondi Beach-də baş verən terror hücumundan sonra cəmiyyətdə yaranan “mədəni həssaslıqları” əsas gətirərək Abdel-Fattahın proqramdan çıxarıldığını bildirib. Heyət yazıçının və ya əsərlərinin hücumla əlaqəli olmadığını qəbul etsə də, qərarın onun keçmiş açıqlamaları ilə bağlı verildiyini qeyd edib.
Macquarie Universitetinin əməkdaşı olan Randa Abdel-Fattah qərarı “utancverici irqçilik və senzura nümunəsi” adlandırıb. O bildirib ki, Bondi faciəsi ilə heç bir əlaqəsi olmayan fələstinli bir şəxsin mövcudluğunun “mədəni baxımdan həssas” sayılması onun insani kimliyinin inkarıdır.
Qərardan sonra festival proqramında yer alan bir çox yazıçı Abdel-Fattahla həmrəylik məqsədilə iştirakdan imtina edib. Boykota qoşulanlar arasında Zadie Smith, Yanis Varoufakis, Miles Franklin mükafatı laureatı Michelle de Kretser, eləcə də Helen Garner, Chloe Hooper, Sarah Krasnostein, jurnalist Peter Greste və Stella mükafatı sahibi şair Evelyn Araluen yer alır.
Bundan əlavə, festivalın əsas dəstəkçilərindən olan Australia Institute düşüncə mərkəzi yazıçıların senzura olunmasının fikir azadlığı prinsiplərinə zidd olduğunu bildirərək 2026-cı il üçün sponsorluğunu geri çəkdiyini açıqlayıb.
Mənbə: Trthaber.com