Bugun.tv-yə daxil olan məlumata görə, iqtisadçı deputat Vüqar Bayramov öz sosial media hesabında Xocalı Soyqırımının 34-cü ildönümü ilə bağlı paylaşım edib.
Deputat xatırladıb ki, Ulu Öndər Heydər Əliyev Xocalı soyqırımının onuncu ildönümü ilə əlaqədar 2002-ci il 25 fevral tarixli müraciətində faciənin 200 ilə yaxın bir müddətdə erməni şovinist-millətçiləri tərəfindən azərbaycanlılara qarşı həyata keçirilən etnik təmizləmə və soyqırım siyasətinin davamı və ən qanlı səhifəsi olduğunu vurğulamışdı.
Vüqar Bayramov qeyd edib ki, Azərbaycan xalqı və dövləti Xocalı faciəsini heç vaxt unutmur və unutmayacaq.
Eyni zamanda deputat bildirib ki, işğaldan azad edilmiş Xocalıda yeni həyat başlayıb, Azərbaycan Prezidentinin rəhbərliyi ilə rayon yenidən qurulur və inkişaf etdirilir. Hazırda Xocalı şəhəri və 7 kənd daxil olmaqla artıq 4 mindən çox sakin məskunlaşıb.
Deputat əlavə edib ki, Xocalı şəhidləri hər zaman dərin hüzn və ehtiramla yad olunur, onların qanı yerdə qalmayıb, yaddaşımızda əbədi yaşayır.
