ABŞ və Ukrayna Rusiya-Ukrayna müharibəsinin dayandırılmasına yönəlik müzakirə prosesi çərçivəsində İsveçrənin Cenevrə şəhərində ikitərəfli danışıqlara başlayıb.
Ukrayna Milli Təhlükəsizlik və Müdafiə Şurasının katibi Rüstəm Umerov sosial media hesabında bildirib ki, Cenevrədə keçirilən görüşlərdə ABŞ Prezidenti Donald Trampın müşaviri Jared Kushner və Yaxın Şərq üzrə xüsusi nümayəndəsi Steve Witkoffun daxil olduğu ABŞ nümayəndə heyəti ilə müzakirələr aparılır.
Ukrayna nümayəndə heyətinə iqtisadiyyat yönümlü rəsmilər, o cümlədən iqtisadiyyat və kənd təsərrüfatı sahəsinin təmsilçiləri daxildir. Tərəflər Ukraynanın bərpası mexanizmləri, investisiya cəlbi alətləri və uzunmüddətli əməkdaşlıq çərçivəsini müzakirə edir.
Umerov əlavə edib ki, Rusiya tərəfinin də iştirak edəcəyi növbəti üçtərəfli görüşün hazırlıqları da gündəmdədir. Humanitar yardım və əsir mübadiləsi məsələlərinin əsas prioritetlərdən biri olduğu vurğulanıb.
Bundan əvvəl üçtərəfli danışıqların iki raundu BƏƏ-nin paytaxtı Əbu-Dabidə, daha bir mərhələsi isə Cenevrədə keçirilmişdi.
Mənbə: TrtHaber