Çinli alimlər müəyyən ediblər ki, vitamin K-nın müntəzəm qəbulu yaşlı insanlarda əzələ gücünün qorunmasına kömək edir və sarkopeniya riskini azalda bilər.
Tədqiqatın nəticələri Frontiers in Nutrition jurnalında dərc olunub.
Sarkopeniya yaşla bağlı əzələ kütləsi və gücünün azalmasıdır. Bu vəziyyət zəiflik, hərəkət məhdudiyyəti və həyat keyfiyyətinin aşağı düşməsi ilə müşayiət olunur.
Prosesi xroniki iltihab, hüceyrə və mitoxondrilərin zədələnməsi sürətləndirir. Mütəxəssislər bildirirlər ki, fiziki aktivlik və kifayət qədər zülal qəbulu bu prosesi ləngidə bilər.
Araşdırmaya görə, vitamin K yalnız qanın laxtalanmasında deyil, həm də əzələ toxumasının qorunmasında mühüm rol oynayır. O, xüsusi zülalları (VKDP) aktivləşdirir. Bunlara daxildir:
- osteokalsin — əzələlərin bərpasını sürətləndirir;
- MGP — damar divarını möhkəmləndirir;
- Gas6 — mitoxondrilərin funksiyasını sabit saxlayır.
Bundan əlavə, vitamin K iltihabın azalmasına, hüceyrə ölümünün (ferroptoz) qarşısının alınmasına və kalsium mübadiləsinin tənzimlənməsinə kömək edir. Laborator tədqiqatlar göstərir ki, bu xüsusiyyətlər vitamin K-nı yaşla bağlı əzələ itkisinə qarşı perspektivli vasitəyə çevirir.
Alimlər vurğulayırlar ki, vitamin K əlavələri qəbul etməzdən əvvəl həkimlə məsləhətləşmək vacibdir. Xüsusilə antikoaqulyant dərmanlar qəbul edən şəxslər diqqətli olmalıdır, çünki vitamin K bu preparatların təsirini dəyişə bilər.
Tədqiqatçılar sarkopeniyanın profilaktikası üçün vitamin K-nın optimal istifadəsini müəyyən etmək məqsədilə daha genişmiqyaslı araşdırmaların aparılmasının zəruri olduğunu bildirirlər.
Mənbə: mail.ru