Glasgow şəhərində yerləşən və ölkənin ən işlək dəmiryol qovşaqlarından biri olan Glasgow Central Railway Stationda baş verən yanğın nəticəsində tarixi bina dağılıb, stansiya isə müvəqqəti olaraq bağlanıb.
Scottish Fire and Rescue Service tərəfindən verilən məlumata görə, yanğın dünən saat 16:00 radələrində stansiya ərazisində yerləşən dörd mərtəbəli kommersiya binasında fəaliyyət göstərən mağazalardan birində başlayıb. Bildirilir ki, birdəfəlik elektron siqaret məhsulları satan mağazada başlayan alov qısa müddətdə bütün binanı bürüyüb.
Hadisə yerinə 18 yanğınsöndürmə maşını və 3 xüsusi nərdivanlı briqada cəlb olunub. Gecə saatlarına qədər davam edən müdaxilədən sonra yanğın səhər saatlarında tam nəzarət altına alınıb.
Yanğın zamanı stansiyanın künc hissəsində yerləşən və qorunan tarixi statusa malik bina tamamilə çöküb. Hadisə nəticəsində ölən və ya yaralanan olmadığı bildirilib.
Rəsmilər gündə təxminən 70 min sərnişinin istifadə etdiyi Qlazqo Mərkəzi stansiyasının ən azı iki gün bağlı qalacağını açıqlayıblar.
ScotRail sərnişinlərin yaxınlıqdakı digər stansiyalara yönləndiriləcəyini bildirib. Avanti West Coast şirkəti isə London–Qlazqo marşrutu üzrə bilet alan sərnişinlərin əlavə ödəniş etmədən London North Eastern Railway (LNER) qatarları ilə Edinburgh istiqamətində səyahət edə biləcəyini açıqlayıb.
John Swinney isə stansiyanın yenidən fəaliyyətə başlaması və yaranan ziyanın aradan qaldırılması üçün Glasgow City Councila maliyyə dəstəyi veriləcəyini bildirib.
Mənbə: Ensonhaber