ABŞ-ın İranla müharibəsinin üçüncü həftəsinə yaxınlaşdığı bir vaxtda Prezident Donald Trump Yaponiyanın baş naziri Sanae Takaichi ilə Ağ Evdə görüş keçirib və bir sıra diqqətçəkən açıqlamalar verib.
Görüş zamanı Tramp Pentaqon üçün 200 milyard dollar həcmində yeni maliyyələşdirmə tələb edə biləcəyini təsdiqləyərək, bunu “müharibə üçün ödəniləcək kiçik bir maliyyə” kimi qiymətləndirib. O, həmçinin neft qiymətlərinin daha kəskin artacağını gözlədiyini bildirib.
ABŞ prezidenti Yaponiyanın İranla bağlı hərbi əməliyyatlara verdiyi dəstəyi yüksək qiymətləndirib və bunu NATO ölkələrinin mövqeyi ilə müqayisə edərək fərqli yanaşma olduğunu vurğulayıb. Bunun fonunda bir sıra Avropa ölkələri və Yaponiya Hörmüz boğazında təhlükəsiz keçidin təmin edilməsinə hazır olduqlarını açıqlayıb.
Tramp bildirib ki, İsrailin baş naziri Benjamin Netanyahu ilə danışaraq İranın neft və qaz obyektlərinə hücumların dayandırılmasını istəyib. Eyni zamanda, ABŞ-ın İranın Cənubi Pars qaz yatağına mümkün zərbə planlarından xəbərsiz olduğunu desə də, bəzi mənbələr bu iddianı təkzib edir.
ABŞ lideri Yaxın Şərqə əlavə qoşun göndərilməsi ilə bağlı iddialara da münasibət bildirərək hazırda belə planın olmadığını deyib, lakin bu məsələdə tam açıqlama verməkdən yayınıb.
Digər tərəfdən, ABŞ-ın müdafiə naziri Pete Hegseth Pentaqonda keçirdiyi brifinqdə müharibə zamanı həlak olan amerikalı hərbçilərin qurbanlarını ilk dəfə rəsmi şəkildə qeyd edib və əməliyyatların plan üzrə davam etdiyini bildirib.
ABŞ Milli Kəşfiyyat direktoru Tulsi Gabbard isə Konqresdə çıxışı zamanı İranın nüvə proqramının əvvəlki zərbələrə baxmayaraq yenidən bərpa olunması niyyətinin qaldığını deyib. O, həmçinin ABŞ və İsrailin müharibə məqsədlərinin tam üst-üstə düşmədiyini və Tel-Əvivin mümkün razılaşmanı dəstəkləyib-dəstəkləməyəcəyinin qeyri-müəyyən olduğunu vurğulayıb.
Mənbə: CNN