İranın xarici işlər naziri Abbas Arakçi ABŞ və İsrailin hücumları nəticəsində ölkədə 600-dən çox məktəbin dağıldığını və ya zədələndiyini açıqlayıb.
Arakçi BMT İnsan Hüquqları Şurası tərəfindən Cenevrədə keçirilən təcili iclasda videobağlantı vasitəsilə çıxış edərək bildirib ki, 28 fevraldan bu yana davam edən hərbi əməliyyatlar nəticəsində 1000-dən çox şagird və müəllim həyatını itirib və ya yaralanıb.
Nazir xüsusilə İranın cənubunda yerləşən Minab şəhərindəki ibtidai məktəbə hücumu vurğulayıb. Onun sözlərinə görə, bu hücum nəticəsində 175-dən çox şagird və müəllim həyatını itirib və hadisə “qəsdən həyata keçirilmiş zərbə” olub.
Arakçi İranın “qanunsuz müharibənin hədəfinə çevrildiyini” bildirərək, hücumların beynəlxalq hüquqa zidd olduğunu qeyd edib. O, məktəblərin və digər mülki obyektlərin vurulmasını “müharibə cinayəti və insanlığa qarşı cinayət” kimi qiymətləndirib.
İranlı nazir həmçinin xəstəxanalar, təcili yardım xidmətləri, enerji obyektləri və yaşayış məntəqələrinin də hücumlara məruz qaldığını iddia edib. Onun sözlərinə görə, bu cür əməliyyatlar mülki əhaliyə qarşı sistemli hücum xarakteri daşıyır.
Arakçi çıxışında İranın müharibə istəmədiyini, lakin özünü müdafiə etməkdə qətiyyətli olduğunu vurğulayaraq, beynəlxalq ictimaiyyəti məsul şəxslərin cavab verməsinə çağırıb.
Mənbə: İLKHA