Alimlər müəyyən ediblər ki, ev pişiklərinin yeməyi yarımçıq qoymasının səbəbi təkcə toxluq hissi ilə bağlı deyil.
Məlumdur ki, ev pişikləri gün ərzində bir neçə dəfə az miqdarda qidalanır. Bu davranış onların əcdadı olan Felis silvestris lybica ilə əlaqələndirilir. Lakin yeni araşdırma göstərir ki, yeməyə marağın azalmasının əsas səbəblərindən biri qoxuya alışmaqdır.
Yaponiyanın Iwate University alimləri tərəfindən aparılan və Physiology & Behavior jurnalında dərc olunan tədqiqatda pişiklərin qidalanma davranışı öyrənilib.
Təcrübə zamanı pişiklərə eyni yemək bir neçə dəfə təqdim edildikdə, onların hər dəfə daha az qida qəbul etdiyi müşahidə olunub. Lakin yemək növü dəyişdirildikdə, qəbul edilən qida miqdarı yenidən artıb.
Araşdırma həmçinin göstərib ki, hətta yeməyin özü dəyişməsə belə, sadəcə fərqli qoxunun əlavə edilməsi pişiklərin iştahasını bərpa edə bilir.
Alimlər bildirir ki, bu nəticələr pişiklərin yeməyi yalnız tox olduqları üçün deyil, eyni qoxuya alışdıqları üçün də dayandırdıqlarını sübut edir.
Tədqiqatın nəticələri xüsusilə yaşlı və ya xəstə pişiklərin qidalanmasının yaxşılaşdırılması üçün yeni strategiyaların hazırlanmasına kömək edə bilər. Həmçinin, müxtəlif qoxulara malik yemlərin istehsalı ilə heyvanların yeməyə marağını artırmaq mümkün ola bilər.
Mənbə: ScienceNews