Böyük Britaniyanın köklü media qurumlarından biri olan The Telegraph rəsmi şəkildə Alman media qrupu Axel Springer tərəfindən satın alınıb.
Böyük Britaniya hökuməti bu sövdələşməyə icazə verib və bununla da təxminən üç ildir davam edən satış prosesi yekunlaşıb.
Mədəniyyət naziri Lisa Nandy açıqlamasında bildirib ki, razılaşmaya rəqabət və xarici mülkiyyət baxımından müdaxilə etməyə ehtiyac görülməyib.
578 milyon sterlinlik razılaşma
Axel Springer daha əvvəl açıqlamışdı ki, “The Telegraph”ın çap və rəqəmsal aktivləri üçün 578 milyon sterlin (təxminən 661 milyon dollar) ödəyəcək. Şirkət eyni zamanda Bild, Die Welt və Politico kimi tanınmış media qurumlarının sahibidir.
Uzun çəkən satış prosesi
Qəzetin satışı son üç ildə beynəlxalq investorların diqqət mərkəzində olub. 2023-cü ildə ABŞ-ın RedBird Capital və Abu-Dabidə yerləşən International Media Investments şirkətlərinin ortaq təşəbbüsü olan RedBird IMI bu aktivləri almaq üçün razılığa gəlmişdi.
Lakin Böyük Britaniya hökuməti Abu-Dabinin media azadlığı ilə bağlı göstəricilərinə görə narahatlıq bildirərək prosesi dayandırmış və yenidən qiymətləndirilməsini tələb etmişdi.
“Redaksiya müstəqilliyi qorunacaq”
Axel Springer-in baş icraçı direktoru Mathias Döpfner bildirib ki, razılaşmadan sonra qəzetə ciddi investisiyalar ediləcək. Onun sözlərinə görə, “The Telegraph” qlobal media şəbəkəsinə qoşulsa da, redaksiya xətti və Britaniya kimliyi qorunacaq.
Beləliklə, son təsdiqlə birlikdə qəzetin gələcəyi ilə bağlı qeyri-müəyyənlik aradan qalxmış oldu.
Mənbə: Ensonhaber