Çin minlərlə metr dərinlikdə fəaliyyət göstərə bilən və sualtı kabelləri kəsmək gücünə malik yeni texnologiyanı uğurla sınaqdan keçirib.
Məlumata görə, ölkənin Təbii Sərvətlər Nazirliyinin təşkil etdiyi dərin dəniz ekspedisiyası zamanı “Haiyang Dizhi 2” tədqiqat gəmisi vasitəsilə 2026-cı ilin ilk elmi missiyası həyata keçirilib. Sınaqlar çərçivəsində xüsusi kəsici qurğu 3 500 metr dərinlikdə yoxlanılıb.
Hərbi və mülki istifadə potensialı
Yeni texnologiya elektrohidrostatik aktuator (EHA) sistemi əsasında hazırlanıb. Bu sistem hidravlik mexanizmi, elektrik mühərrikini və idarəetmə blokunu birləşdirərək daha kompakt və effektiv işləmə imkanı yaradır.
Mütəxəssislər bildirirlər ki, qurğu yalnız mülki sahədə – xüsusilə dərin dəniz neft və qaz kəmərlərinin tikintisi və təmirində deyil, həm də hərbi məqsədlər üçün istifadə oluna bilər.
Real istifadəyə hazırdır
Rəsmi mənbələrə görə, keçirilən sınaqlar cihazın artıq laboratoriya mərhələsini keçdiyini və real şəraitdə tətbiqə hazır olduğunu göstərir. Çin Elm Qəzeti bu testin texnologiyanın mühəndislik tətbiqinə keçidində son mərhələ olduğunu vurğulayıb.
Ekspertlər hesab edirlər ki, belə texnologiyalar gələcəkdə qlobal kommunikasiya infrastrukturu üçün strateji əhəmiyyət kəsb edə bilər. Çünki dənizaltı kabellər dünya üzrə internet və məlumat ötürülməsinin əsas hissəsini təşkil edir.
Mənbə: EnSonHaber