Sony şirkətinin hazırladığı “Ace” adlı robot stolüstü tennisdə peşəkar idmançılar səviyyəsində çıxış edərək diqqət çəkib.
Məlumata görə, “Ace” 8 oynaq sistemi ilə təchiz olunub və bu quruluş ona yüksək çeviklik və sürətli reaksiya imkanı verir. Robot həmçinin beynəlxalq stolüstü tennis qaydalarına uyğun şəkildə oyun oynamaq üçün öyrədilib və artıq peşəkar idmançılarla matçlarda iştirak edib.
Layihə çərçivəsində Tokio şəhərində xüsusi ölçülü tennis meydançası qurulub. Burada robotun real idmançılarla bərabər şəraitdə yarışması təmin edilib.
Təcrübə oyunlarında Yaponiyanın peşəkar stolüstü tennisçiləri Minami Ando və Kakeru Sone robotla qarşılaşıblar. Qarşılaşmaları Yapon Stolüstü Tennis Assosiasiyasının hakimləri idarə edib.
“Ace” sisteminə 9 kamera inteqrasiya olunub və robot topun hərəkətini, hətta fırlanma istiqamətini belə analiz edə bilir. Bu isə ona oyun strategiyasını real vaxtda dəyişmək imkanı verir.
Robot “reinforcement learning” (mükafatlandırma ilə öyrənmə) üsulu ilə hazırlanıb və yalnız əvvəlcədən proqramlaşdırılmış hərəkətlər deyil, vəziyyətə uyğun adaptasiya bacarığı qazanıb.
Son sınaqlarda “Ace” əksər insan oyunçuları məğlub edib. Yalnız bir peşəkar idmançı ona qalib gələ bilib.
Təcrübədə iştirak edən 1992 Barselona Olimpiadasının iştirakçısı Kinjirō Nakamura robotun performansını yüksək qiymətləndirərək bildirib ki, bu səviyyədə oyun insan üçün belə çətin əldə edilən nəticədir.
Sony bu nailiyyəti robotların yalnız istehsalatda deyil, idman və digər sahələrdə də yüksək adaptasiya qabiliyyətinə malik ola biləcəyinin göstəricisi kimi qiymətləndirir.
Mənbə: mail.ru