Şimali Koreyada COVID-19 pandemiyası dövründə edamların kəskin şəkildə artdığı bildirilir.
Məlumata görə, ölkədə xüsusilə xarici mədəniyyət məhsullarından istifadə edənlərə və siyasi ittihamlarla mühakimə olunan şəxslərə qarşı edam cəzaları geniş yayılıb. Bildirilir ki, Kim Jong-un rəhbərliyindəki rejim pandemiya dövründə nəzarəti daha da sərtləşdirib.
Hesabatda qeyd olunur ki, 2020-ci ilin yanvarında sərhədlərin bağlanmasından sonra ötən təxminən 5 il ərzində edamların sayı əvvəlki dövrlə müqayisədə iki dəfədən çox artıb. Eyni zamanda ölüm hökmünə məhkum edilənlərin sayının isə üç dəfədən çox yüksəldiyi bildirilir.
Araşdırma yüzlərlə Şimali Koreyadan qaçqının ifadələrinə əsaslanır və ümumilikdə 144 edam və ölüm hökmü faktı təhlil edilib.
Qeyd olunur ki, pandemiyadan sonra xüsusilə Cənubi Koreya istehsalı olan film, serial və musiqilərin izlənilməsi kimi “xarici mədəniyyət” fəaliyyətlərinə görə verilən edam cəzalarında ciddi artım müşahidə olunub. Eyni zamanda lideri tənqid etmək kimi siyasi addımlar da ağır cəzalandırılır.
Hesabatda bu tendensiyanın ölkədə artan narazılıq fonunda hakimiyyətin təzyiqləri gücləndirməsi ilə əlaqəli ola biləcəyi vurğulanır.
Bildirilib ki, edamların təxminən dörddə üçü ictimai şəkildə həyata keçirilir və əksər hallarda güllələnmə üsulu tətbiq olunur.
Bundan əlavə, ölkədə minlərlə insanın saxlanıldığı siyasi məhbus düşərgələrinin mövcud olduğu və burada ağır şəraitdə məcburi əməyə cəlb edildiyi qeyd edilir. BMT rəsmiləri isə son illərdə Şimali Koreyada insan hüquqları vəziyyətinin yaxşılaşmadığını, əksinə daha da pisləşdiyini bildirir.
Mənbə: EnSonHaber