BMT-nin Baş katibi Antonio Guterres bildirib ki, təşkilata üzv olan bütün dövlətlər istisnasız olaraq büdcəyə məcburi ödənişlər etməlidir və bu məsələ müzakirə predmeti deyil.
Quterreş jurnalistlərin, ABŞ administrasiyasının müəyyən şərtlər yerinə yetirilmədiyi halda BMT-nin maliyyələşdirilməsini dondurmaqla bağlı hədələri barədə suallarını cavablandırarkən bu mövqeni ifadə edib.
“Bəhs etdiyimiz vəsait qiymətləndirilmiş töhfələrdir. Bu töhfələr üzv dövlətlərin öhdəliyidir və müzakirə oluna bilməz. Biz, əlbəttə, islahatları davam etdirəcək, təşkilatın daha effektiv və səmərəli fəaliyyət göstərməsi üçün çalışacağıq. Lakin bunlar ayrı məsələlərdir”, – deyə o vurğulayıb.
Məlumata görə, Donald Trump administrasiyasının daxili diplomatik sənədlərində Vaşinqtonun BMT-dən bir sıra sürətli islahatlar tələb etdiyi qeyd olunur. Bu tələblərə inzibati xərclərin daha da azaldılması və Çin tərəfindən Baş katibin xüsusi fonduna yönəldilən vəsaitlərlə bağlı məhdudiyyətlərin tətbiqi daxildir.
Sənədlərdə bildirilir ki, BMT-nin inzibati büdcəni 15 faiz azaltmaq və 3000-ə qədər vəzifəni ixtisar etmək planları ABŞ tərəfindən yetərli hesab edilmir və Vaşinqton bu halda maliyyələşdirməni dayandıra bilər.
Qeyd edək ki, ABŞ 2026-cı ilin fevralında BMT-yə 160 milyon dollar ianə ödəyib. Bununla belə, Associated Press məlumatına görə, ölkənin təşkilata ümumi borcu 3,84 milyard dollar olaraq qalır.
Mənbə: TASS