Birləşmiş Millətlər Təşkilatı bildirib ki, Sudanda davam edən müharibə və Cənubi Sudanda sabitliyin pozulması Abyey bölgəsində siyasi irəliləyişə ciddi təsir göstərir.
Birləşmiş Millətlər Təşkilatı Təhlükəsizlik Şurasında çıxış edən təşkilatın Afrika məsələləri üzrə baş katibinin köməkçisi Marta Ama Akyaa Pobi bildirib ki, bu vəziyyət Sudan və Cənubi Sudan arasında Abyeyin idarə olunması və yekun hüquqi statusu ilə bağlı fikir ayrılıqlarının həllini çətinləşdirib.
Onun sözlərinə görə, son altı ay ərzində Abyeydə təhlükəsizlik şəraiti daha da pisləşib. Bölgədə cinayət hadisələrinin artması, silahlanma və nəzarətsiz silahlı qrupların fəaliyyəti sabitliyi zəiflədib.
BMT-nin məlumatına əsasən, bu il ərzində Abyeydə 196 təhlükəsizlik hadisəsi qeydə alınıb. Həmin insidentlər nəticəsində 58 nəfər ölüb, 69 nəfər yaralanıb. Bu göstəricilər ötən illə müqayisədə artım deməkdir.
BMT baş katibinin Cənubi Sudan üzrə xüsusi nümayəndəsinin müavini Quanq Conq isə vurğulayıb ki, 2023-cü ildən bəri Sudandakı müharibə səbəbindən 1,3 milyondan çox insan Cənubi Sudana sığınıb. Onun sözlərinə görə, bu böyük köç dalğası ərzaq, səhiyyə və təhsil imkanları onsuz da məhdud olan ərazilərdə humanitar vəziyyəti daha da ağırlaşdırıb.
Rəsmilər qeyd edirlər ki, Abyeyin yekun statusu hələ də Sudan ilə Cənubi Sudan arasında həllini tapmayan əsas məsələlərdən biri olaraq qalır. BMT tərəflər arasında dialoqun yenidən başlanması üçün səylərini davam etdirir.
Abyey bölgəsi ilə bağlı mübahisə 2005-ci ildən davam edir. Neft ehtiyatları ilə zəngin olan bu ərazinin gələcək statusunun danışıqlar yolu ilə müəyyənləşdirilməsi nəzərdə tutulsa da, indiyədək yekun razılaşma əldə olunmayıb.
Mənbə: Anadolu Agentliyi