Bugun.tv xəbər verir ki, Latviyanın hava məkanına naməlum pilotsuz uçuş aparatının (PUA) daxil olması NATO qüvvələrinin hərəkətə keçməsinə səbəb olub. Xarici KİV-lərin məlumatına görə, təhlükənin qarşısını almaq məqsədilə NATO-ya məxsus döyüş təyyarələri havaya qaldırılıb.
Latviya ordusunun yaydığı açıqlamada bildirilib ki, ölkənin şərq sərhədlərində hava hücumundan müdafiə imkanları gücləndirilib və əlavə hərbi qüvvələr bölgəyə göndərilib. Rəsmi qurumlar Rusiyanın Ukraynaya qarşı davam edən müharibəsi fonunda bu cür insidentlərin təkrarlana biləcəyini vurğulayıblar.
Bununla yanaşı, Latviya hökuməti Rusiya və Belarus sərhədinə yaxın ərazilərdə yaşayan vətəndaşlara növbəti açıqlamaya qədər evlərini tərk etməmək barədə xəbərdarlıq edib.
Məlumata görə, son aylarda Ukraynaya məxsus uzaqmənzilli PUA-ların Baltik dənizi istiqamətində aktivliyi artıb. Daha əvvəl Finlandiya, Estoniya və Litva hava məkanlarında da oxşar hadisələr qeydə alınmışdı.
Qeyd edək ki, ötən həftə Latviya hökuməti hava məkanı pozuntularına reaksiyası ilə bağlı yaranan narazılıqlar səbəbindən istefa vermişdi.
Mənbə: Ensonhaber