Bugun.tv xəbər verir ki, ABŞ Müdafiə Nazirliyinin (Pentaqon) binasında qeydə alınan hava keyfiyyəti problemi səbəbindən bir neçə mərtəbə və dəhliz bağlanıb, təxliyə tədbirlərinə başlanılıb.
Pentaqonun sözçüsü Şon Parnell bildirib ki, binadaxili sistemlər hava keyfiyyəti ilə bağlı problem aşkarlayıb. Hadisənin səbəbləri tam müəyyənləşdirilənədək ehtiyat tədbirlərinin tətbiq olunduğu qeyd edilib.
Məlumata görə, nazirliyin standart təhlükəsizlik protokolları işə salınıb. Riskli ərazilərdə olan əməkdaşlara olduqları yerdə qalmaq göstərişi verilib, fövqəladə hallara müdaxilə qrupları isə hazır vəziyyətə gətirilib.
Yerli mənbələrin məlumatına əsasən, Pentaqon kompleksinin ikinci və beşinci mərtəbələri arasında yerləşən bəzi dəhlizlər tamamilə bağlanıb. Təhlükəsizlik əməkdaşlarının qaz maskaları və xüsusi kimyəvi mühafizə geyimləri ilə xidmət apardığı bildirilib.
Hadisə yerinə Pentaqon Mühafizə Xidmətinin təhlükəli maddələr üzrə xüsusi qrupu cəlb olunub. Onlara Arlington Yanğınsöndürmə Departamentinin əməkdaşları da dəstək verir.
Yanğınsöndürmə xidməti sosial şəbəkə hesabında paylaşdığı məlumatda binada təhlükəli maddələrlə bağlı əməliyyat aparıldığını təsdiqləyib.
Mənbə: TrtHaber