Bugun.tv xəbər verir ki, Çin alimləri Sakit okeanın dərinliklərində həyata keçirdikləri 52 günlük elmi ekspedisiyanın nəticələrini açıqlayıblar.
Məlumata görə, tədqiqat qrupu ekspedisiya müddətində 13 min kilometrdən çox məsafə qət edərək okean dibindən nadir minerallar və təxminən 90 kiloqram ağırlığında bazalt süxurları çıxarmağa nail olub.
Alimlər bildiriblər ki, toplanmış nümunələr Yer kürəsinin geoloji tarixi və okean dibinin formalaşma proseslərinin öyrənilməsi baxımından mühüm əhəmiyyət daşıyır. Nümunələrin laboratoriyalarda ətraflı təhlil ediləcəyi qeyd olunub.
Ekspedisiya zamanı Çin tərəfindən hazırlanmış yeni nəsil dərin dəniz tədqiqat sistemi də ilk dəfə real şəraitdə sınaqdan keçirilib. Bildirilir ki, bu sistem okean dibinin quruluşunu daha dəqiq və ətraflı araşdırmaq imkanına malikdir.
Tədqiqatçılar hesab edirlər ki, əldə olunan məlumatlar gələcəkdə okeanların öyrənilməsi və geoloji proseslərin daha dərindən anlaşılmasına töhfə verəcək.
Mənbə: Ensonhaber